Башор Асад, раисҷумҳури сарнагуншудаи Сурия, ҳанӯз таҳаввулотро дар кишвараш шарҳ надода, дар маҳзари умум пайдо нашудааст. Расонаҳои давлатии Русия гуфтанд, ки ӯ ва пайвандонаш шаби 8-уми декабр ба Маскав расида, дар Русия паноҳгоҳ ёфтанд.
Сухангӯйи Кремл рӯзи 9-уми декабр гуфт, ки паноҳандагӣ додан ба Асад ва хонаводааш тасмими президент Владимир Путин буд. Дмитрий Песков ҳам нагуфт, ки Башор Асад ҳоло дар куҷост, вале афзуд, дар ҷадвали мулоқоти Путин суҳбат бо ӯ дар назар нест.
Ҳукумати Башор Асад 8-уми декабр, баъд аз ёздаҳ рӯз ҳамлаи ғофилгиронаи шӯришиён суқут кард ва бо ҳамин 53 сол ҳукуматдории хонадони ӯ дар Сурия поён ёфт.
Виктор Янукович, раисҷумҳури фирории Украина, соли 2014 дар Русия ҷой гирифт. Маскав ӯро муддате раисҷумҳури қонунӣ медонист, аммо дертар эътирофи ӯро дар ин мақом бас кард.