Дуюмин давраи ин мусобиқа бо иштироки паҳлавонони ҷавон аз 15 кишвар дар маркази вилояти Суғд баргузор шуд. Варзишгарон дар панҷ вазн рақобат карданд.
Ду паҳлавон аз Узбекистон - Самариддин Қучқоров дар вазни то 60 кило ва Элбек Тоҷиев дар вазни то 78 кило - пирӯз шуданд. Николоз Давладзе аз Гурҷистон дар вазни то 86 кило ва Эмирхон Жолдожқозиев аз Қирғизистон дар вазни беш аз 86 кило ҷойҳои аввалро гирифтанд.
Инчунин Роман Кремилан, ки дар ҳайати дастаи Федератсияи байналмилалии гуштигирӣ ҳунарнамоӣ кард, дар вазни то 65 кило мақоми аввалро касб намуд.
Аммо паҳлавонони тоҷик бе медали тило монданд. Се нафари онҳо - Ёсин Бобокалонов дар вазни то 65 кило, Беҳрӯз Абдураҳмонов дар вазни то 86 кило ва Баҳром Имомзода дар вазни беш аз 86 кило – дар финал аз рақибонашон шикаст хӯрда, бо медалҳои нуқра мукофотонида шуданд.
Ҳашт паҳлавони ҷавони тоҷик - Хушдил Назаров, Ҷӯрахон Ҳамрохонзода (ҳарду дар вазни то 60 кило), Ҷонон Файзалов (дар вазни то 65 кило), Сайраҳмон Қодиров (дар вазни то 78 кило), Суннатулло Мӯсоев, Мусохон Ғаниев (ҳарду дар вазни то 86 кило), Парвиз Абдураҳмонов ва Маҳмадрасул Мирхонов (ҳарду дар вазни беш аз 86 кило) – бо медалҳои биринҷӣ сарфароз гаштанд.
Ба ғолибону ҷоизадорони ин мусобиқаи байналмилалӣ ба ғайр аз ҷому медал, ҷоизаҳои молӣ тақдим гардид. Маблағи умумии ҷоизаҳои молии дуюмин мусобиқаи байналмилалии гуштигирӣ миёни ҷавонон барои дарёфти Ҷоми президенти Тоҷикистон 36 ҳазор доллари амрикоиро ташкил медод. Ба ғолибон дар ҳар як вазн 3000 доллар, барои ҷойи дуюм 2000 доллар ва барои ҷойҳои сеюм якҳазордолларӣ супурда шуд.
Ғолибону ҷоизадорони дуюмин мусобиқаи байнулмиллалии гуштигирӣ барои дарёфти Ҷоми президенти Тоҷикистон:
Вазни - 60 кг
1.Самариддин Қучқоров (Узбекистон)
2.Ҷавоҳир Умаров (Узбекистон)
3.Хушдил Назаров (Тоҷикистон)
3.Ҷӯрахон Амрохонзода (Тоҷикистон)
Вазни - 65 кг
1.Роман Кремилан (IGF)
2.Ёсин Бобокалонов (Тоҷикистон)
3.Казюбек Чюнюбеков (Қирғизистон)
3.Ҷонон Файзалов (Тоҷикистон)
Вазни -78 кг
1.Элбек Тоҷиев (Узбекистон)
2.Мекан Пардабоев (Туркманистон)
3.Сайраҳмон Қодиров (Тоҷикистон)
3.Туко Азамат (IGF)
Вазни -86 кг
1.Николоз Давладзе (Гурҷистон)
2. Беҳрӯз Абдураҳмонов (Тоҷикистон)
3. Суннатулло Мусоев (Тоҷикистон)
3.Мусохон Ғаниев (Тоҷикистон)
Вазни +86 кг
1.Эмирхон Жолдожқозиев (Қирғизистон)
2.Баҳром Имомзода (Тоҷикистон)
3.Парвиз Абдураҳмонов (Тоҷикистон)
3.Маҳмадрасул Мирхонов (Тоҷикистон)